Сè уште не е пронајдена нова варијанта на коронавирусот во Кина, покажуваат податоците објавени денеска од Светската здравствена организација (СЗО), со што се ублажува дел од загриженоста за инфекцијата што брзо се шири низ Кина откако Пекинг го прекина пристапот на нула ковид-случаи.
Мнозинството жители на Кина, 97,5 отсто од нив, се заразени со подваријантите на омикрон BA.5.2 и BF.7, објави СЗО. Тие податоци се засноваат на анализа на повеќе од 2.000 геноми на Кинескиот центар за контрола и превенција на болести.
СЗО објави дека овие податоци се во согласност со секвенционирањето на геномите на патниците од Кина што другите земји го испратиле до глобалната база на податоци и дека не е забележана нова мутација или мутација на познати соеви во јавно достапните информации за секвенционирање.
Остатокот од светот се сомнева во кинеските извештаи
СЗО ги објави податоците доставени од Кинескиот центар еден ден откако неговите претставници се сретнаа со кинеските научници, во време кога остатокот од светот се сомнева во точноста на кинеските извештаи за ширење на инфекцијата што ги преполни кинеските болници.
Официјалниот весник на кинеската Комунистичка партија се обиде да ги смири граѓаните, прогласувајќи „конечна победа“ над коронавирусот и отфрлајќи ги критиките за строгите мерки за изолација што предизвикаа ретки протести во Кина минатата година.
Здравствените власти ширум светот, во меѓувреме, се борат да го утврдат точниот степен на епидемијата во Кина и како да го запрат нејзиното ширење. Сè повеќе земји воведуваат мерки како што се тестирање на патници кои пристигнуваат од Кина, што Пекинг го критикуваше.
Шефот на СЗО, Тедрос Аданом Гебрејесус, на прес-конференција рече дека организацијата продолжува да бара од Кина побрзи и поредовни податоци за хоспитализирањата и смртните случаи.