„Нема гаф и нема прекршување на протоколот. Ова е приватна посета и на таквите посети недостасува формалната церемонија што важи во такви случаи. Фотографијата е на веб-страницата на Македонското претседателство. Таа беше поставена од нив. И во овој момент, фотографијата се уште е таму како една од водечките вести. Прашањето е зошто се случува ова и од каде ова прашање? Ова е дел од политичкиот систем во Македонија“, смета бугарскиот новинар Љупчо Нешков во однос на случајот со непоставувањето на македонското знаме на средбата меѓу македонската претседателка Гордана Сиљановска-Давкова и бугарскиот претседател Румен Радев.
Според него, прашањето што треба да се реши во Македонија е „дали земјата навистина сака да биде навистина независна или нејзиното постоење е поврзано со омразата кон Бугарите“.
„Во овој случај станува збор за државна идеологија, до вчера тие што беа обвинувани дека се пробугарски, блиски до Бугарија – Социјалдемократскиот сојуз, го користеше овој арсенал што го користеше ВМРО-ДПМНЕ како опозиција. Затоа велам дека ова е прашање за државна идеологија. Рекоа дека била понижена што Сиљановска не обрнала внимание на оваа работа“, нагласил тој во интервју за бугарска „Нова“.
Според него, „нема ништо лошо што Сиљановска Давкова доаѓа во Бугарија“.
„Ако сака културна дипломатија, може цела година да ја обиколи Бугарија – од Балчик до Сандански. Да не зборуваме за Пловдив и Софија. Според мене, ова е обид да се претстави земјата како жртва на светот. Дека Сиљановска сака да најде решение, но еве Бугарија е таа што го блокира влезот на Скопје во ЕУ. А кога ќе дојде во Софија и ќе се случи вакво нешто – тогаш го бараат знамето. Утре ќе го бараат чевелот, чорапот и што и да одлучат. Основата не е ниту знамето ниту било каква изјава. Основата е оваа земја да биде подредена на странските геополитички интереси. Нивната државна идеологија, затоа им велам на довчерашните наводни сојузници и пријатели, сега ја користат истата реторика. Ова е дел од постоењето, дел од системот на оваа земја“, категоричен е бугарскиот новинар.
Нешков е новинарот кој го направи скандалозното интервју со поранешниот премиер Зоран Заев, кое предизвика лавина реакции во македонската јавност, а Заев беше обвинет за сервилност кон Бугарија во однос на отворените прашања меѓу двете земји.