Израел ќе продолжи да се брани и да се придржува до меѓународното право, изјави израелскиот премиер Бенјамин Нетанјаху како одговор на одлуката на Меѓународниот суд на правдата, кој ѝ нареди мерки за спречување на геноцид на земјата, без да нареди запирање на воените напади во Газа.
„Ќе продолжиме да се браниме себеси и сите граѓани со тоа што ќе се придржуваме до меѓународното право“, рече Нетанјаху , додавајќи дека „Израел води праведна војна како ниедна друга земја“.
Меѓународниот суд на правдата донесе привремена одлука за мерките против Израел во случајот во кој Јужноафриканската Република го обвинува за кршење на Конвенцијата за спречување и казнување на злосторството геноцид во Појасот Газа.
Судијката Џоан Донаху рече дека некои од наводите против Израел потпаѓаат под одредбите на Конвенцијата за геноцид.
Судот заклучи дека Израел не направил доволно за да го спречи и казни злосторството на геноцид.
Судијката изјави дека има доволно докази во спорот, додавајќи дека судот нема да го отфрли случајот и дека судот има мандат да преземе привремени мерки.