Портпаролот на хрватската Влада, Марко Милиќ соопшти дека тамошниот министер за одбрана Марио Баножиќ, кој утрово доживеа сообраќајна несреќа, е надвор од животна опасност.
„Министерот има сериозни физички повреди и според првите проценки на лекарите е надвор од животна опасност“, изјавил Милиќ.
Како што пренесува порталот „Index.hr“, до несреќата дошло кога Баножиќ заобиколувал камион, а потоа се судрил со комбе, додека на патот била спуштена магла. Како што нагласува порталот, информацијата се уште не е потврдена.
Според првичните податоци, утврдено е дека Баножиќ немал алкохол во крвта и бил сам во автомобилот. Заминал на лов и во моментот на несреќата носел ловечко одело.
Возачот на комбето кој загина кај Винковац е 40-годишен маж од Привлака. Зад себе ги оставил сопругата и двете мали деца.