Министерството за внатрешни работи ја известува јавноста дека се направени сите потребни проверки во врска со денешните пријави од училиштата во скопско кои добиле порака на електронската адреса со закана за поставена експлозивна направа, и утврдено е дека станува збор за лажни пријави.
Имено, денеска (02.12.2022) околу 07.30 часот во СВР Скопје е пријавено дека на електронски адреси на три основни училишта во скопско е упатена закана за поставена експлозивна нaправа.
Веднаш по добиените пријави, од полициски службеници се преземени мерки за безбедно евакуирање на училиштата, а потоа се извршени и детални проверки од тимови за антитерористички проверки и утврдено е дека станува збор за лажни пријави.
Ова е втор ден по ред дојави за бомби да добиваат и основни училишта во Скопје. Вчера имаше закани за бомби во училиштата „Кочо Рацин“ и „Петар Поп Арсов“.
Претходно закани пристигнуваа само на електронските пошти на поголемите средни училишта во главниот град.
Вчера министерот за внатрешни работи, Оливер Спасовски информира дека МВР веќе има осомничени лица за дојавите на бомбите во скопските училишта.