Во моментов кога избувнал пожарот, овие носители на институции немале како приоритет да поднесат оставка, туку требало да ја менаџираат ситуацијата, вели заменик-министерот за правда, Агим Нухиу за емисијата „200“ на Алсат ТВ, зборувајќи за понудените оставките на министерот и заменик-министерот за здравство и раководството на клиничката болница во Тетово, по големата трагедија во модуларната ковид-болница.
Според него, функционерите дале морална оставка и ова е ноторен факт.
-Сите знаат за ваквото нешто и нема никакви дилеми. Моралната оставка не подразбира вина. Жал ми е што политичкиот застапник што е овде во дебатава, се обидува да поентира политички. Овде не се околности да се зборува за успесите, неуспесите и предизвиците на управниот кадар во тетовската болница. Секој има свој став, но сега не е време за поентирање. Починаа 14 лица и болката е двојно поголема од кој било, бидејќи сме носители на институции, посочува Нухиу.