Обидот за „атентат“ на Путин може да биде пресвртница во војната

од Stefanija Kuzmanovska

Русија во средата соопшти дека Украина се обидела да го убие рускиот претседател Владимир Путин во напад со беспилотно летало врз Кремљ, тврдење што Украина брзо го демантираше. Но, дури и Киев да не стои зад наводниот напад, се верува дека Путин би можел да го искористи инцидентот за ескалација на војната во Украина.

На социјалните мрежи почнаа да кружат снимки на кои се гледа објект кој експлодира над Кремљ. Руската влада објави соопштение во кое се вели дека нејзините воени служби уништиле две беспилотни летала во, како што рече, „планиран терористички напад и обид за атентат врз претседателот“. Украинскиот лидер Володимир Зеленски набрзо негираше вмешаност во тој инцидент.

Не само што многу луѓе веруваат дека Украина не стои зад нападите, туку има и гласини дека нападите со беспилотни летала можеби биле оркестрирани од самата Русија. Без разлика на вистината, се верува дека Путин би можел да го искористи наводниот напад како оправдување за зголемување на руските воени напори во Украина.

Сомнежи за извештајот на Русија

„Не е јасно од каде дојдоа овие беспилотни летала“, рече Марк Н. Кац, од Политичкото училиште Џорџ Мејсон Шар, за Newsweek. „Дури и да беа вооружени, можноста да се одреди локацијата на Путин во комплексот во Кремљ беше прилично мала“.

Пред инцидентот во средата, руските државни медиуми минатата недела објавија за други беспилотни летала пронајдени во близина на Москва, вклучително и еден наводно натоварен со експлозив.

По минатонеделните извештаи, пензионираниот мајор на американската армија Џон Спенсер изјави за Newsweek дека смета дека би било „огромно лоша услуга за Украинците да ја нападнат Москва и да го охрабрат руското население да ја поддржи војната во Украина“.

Спенсер наведува дека овие дронови можеле да бидат испратени од поединци или групи во Русија кои се противат на војната во Украина. Од друга страна, Гај Мекардл, главен уредник на Извештајот на силите за специјални операции (СОФРЕП), вели дека минатонеделните извештаи звучат како „типична руска пропаганда“.

Михаил Касјанов, поранешниот премиер на Русија, кој сега е жесток критичар на Путин, изјави за британскиот Канал 4 вести дека тврдењата за обид за атентат со беспилотно летало се пропаганда што ги користи руската влада „за зајакнување на режимот“.

Путин би можел да го искористи инцидентот како причина за одмазда

Кац наведува дека Кремљ би можел да го искористи овој наводен обид за убиство на Путин како причина да се одмазди и да го нападне украинското раководство. Кремљ веќе ја навести оваа можност. „Русија го задржува правото да преземе контрамерки каде и кога ќе смета дека е потребно“, соопштија оттаму.

Највисоките руски функционери веќе повикаа на одмазда. Вјачеслав Володин, претседателот на долниот дом на рускиот парламент, на Телеграм рече дека „ќе бара употреба на оружје што може да го запре и уништи терористичкиот режим во Киев“.

На акција повика и Дмитриј Медведев, поранешниот претседател на Русија и актуелен заменик претседател на Советот за безбедност на Русија. „По денешниот терористички напад не останува ништо друго освен физичка елиминација на Зеленски и неговата клика“.

Дали Украина стои зад нападот?

Дејвид Силби, вонреден професор по историја во Корнел, рече дека не ја отфрла идејата дека Украина можела да се обиде да го уништи Путин со дронови. Тој наведува дека нападите со беспилотни летала не се невообичаени во војна и потсетува дека за време на оваа инвазија веќе имало неколку обиди за атентат на Зеленски.

Сепак, тој наведува дека овој инцидент би можел да биде уште еден пример за „операција со лажно знаме“ што би послужило како изговор да се оправда некаква ескалација. Каква ескалација може да биде тоа?

„Убиството на Зеленски? Тие веќе го пробаа тоа. Нуклеарно оружје? Сè уште важи истата логика на нуклеарно одвраќање. Масовно стратешко бомбардирање на украинските градови? Тоа е потенцијално веројатно“, рече тој и додаде дека не знае дали Русија има капацитет за такво нешто.

Кац, од друга страна, наведува дека рускиот одговор би можел да биде многу подиректен.

„Очајниот Путин можеби се надева дека исфрлањето на Зеленски може да биде најдобрата надеж за Русија за предизвикување политички хаос во Украина и поткопување на нејзините воени напори“, анализира тој.

Слични содржини