Во Кривичниот суд во Скопје денеска продолжува едно од најболезните судења во поновата историја – случајот за монструозното убиство на 14-годишната Вања Ѓорчевска и велешанецот Панче Жежовски. Атмосферата е напната, а фокусот овој пат е ставен на сведочењето на обвинетиот Влатко Кешишев.
Кешишев, кој досега тврдеше дека за исчезнатите првпат слушнал преку социјалните мрежи, во претходното сведочење призна дека бил дел од операцијата – чувал стража додека другите ја спроведувале акцијата. Сега, на рочиштето, ќе одговара на прашања токму од човекот кој, според обвинението, стои зад целиот заговор – Љупчо Палевски и неговиот адвокат.
Јавниот обвинител, во минатото рочиште, го туркаше Кешишев до ѕид – го праша за пораките со сообвинетите, неговите мотиви и дали воопшто бил свесен што прави. „Бев под влијание на Палевски“, призна Кешишев, но тврдеше дека не разбирал целосно во каква ситуација е втурнат.
Кога обвинителството ја заврши својата линија на испитување, судијата Ивица Стефановски го прочита претходниот исказ на Кешишев – чекор направен поради тоа што Палевски, кој беше отстранет од едно од претходните рочишта, не беше запознаен со кажаното.
По Кешишев, како што најавија од судот, ќе бидат сослушани и Александар Ѓорчевски, таткото на Вања, и повторно самиот Палевски.
Обвинителството тврди дека петмина – Палевски, Видевски, Манев, Кешишев и Ѓорчевски – ја испланирале и извршиле киднапирањето на Вања, со цел да изнудат пари од нејзиното семејство. Панче, пак, бил киднапиран за да им го даде своето возило, со кое ќе ја изведат главната операција – грабнување на девојчето во Скопје.
Вања и Панче беа пријавени за исчезнати крајот на ноември 2023 година, а неколку дена подоцна – на 3 декември – нивните тела беа пронајдени, едното во близина на Скопје, другото кај Велес. Случајот остави трауматични последици врз јавноста, која сè уште бара одговори – и правда.