Владата информира дека Министерството за транспорт во рамки на своите надлежности врши ад хок контрола на издадените лиценци и дозволи за работа во делот на градежното работење и урбанистичкото планирање.
Од досегашните контроли на над 3100 лиценци се констатира следната состојба:
Кај 479 лиценци констатирано е дека по издавањето на лиценците правните лица престанале да ги исполнуваат законските услови врз основа на кои истите се издадени поради тоа се ќе се донесат решенија за одземање и тоа:
• на 73 правни лица лиценца А за изведувач на градби од прва категорија
• на 228 правни лица лиценца Б за изведувач на градби од втора категорија,
• на 9 правни лица лиценца А за надзор над изградбата на градби од прва категорија,
• на 32 правни лица лиценца Б за надзор над изградбата на градби од втора категорија,
• на 32 правни лица лиценца А за проектирање на градби од прва категорија,
• на 78 правни лица лиценца Б за проектирање на градби од втора категорија,
• на 7 правни лица лиценца Б за ревизија на проектна документација на градби од втора категорија,
• на 3 правни лица лиценца А ревизија на проектна документација на градби од прва категорија,
• на 2 правни лица лиценца за управител за одржување на објекти од прва и втора категорија,
• на 2 правни лица лиценца управител на градба
• на 13 правни лица лиценца за изработка на урбанистички планови.
Владата најавува дека и во следниот период Министерството за транспорт ќе продолжи со контролите на издадени дозволи и лиценци согласно своите надлежности со цел да го осигура почитувањето на законските прописи и правниот поредок во државата и да се овозможи рамноправност за сите правни лица.
„Оваа листа ќе биде доставена до соодветните институции за понатамошно постапување. Исто така би сакал да најавам дека ќе пристапиме кон законски измени со кои овие контроли ќе бидат обврзни на секои шест месеци, а не како досега на доброволна основа и за следните контроли жалбата нема да го одлага извршувањето односно суспензијата ќе оди веднаш. Целта не е да казнуваме туку компаниите кои доброволно се согласиле на условите што ги предвидува законот, доброволно да ги исполнуваат, затоа што феноменот е дека во моментот на поднесување на барањето ги исполнуваат, а потоа престануваат да ги исполуваат тие услови. За да не настане забуна, контролите се прават на лиценците во делот на потребниот број на вработени, а во дел на квалитет на изведување и во дел на квалитет на навремено извршување, постојат соодветни надзори кои ги контролираат градбите“, истакна денеска министерот Александар Николоски.
На следниот ЛИНК можете да го видите целиот список на компании.
Во јавноста се постави дилемата што ќе биде со изградените градби на овие оператори односно дали граѓаните треба да стравуваат за својата безбедност во живеалиштата. Дел од експертите во разговор за „Локаллно“ ги смируваа работите и тврдат дека луѓето не треба да бидат загрижени. Според архитектите, лиценцата важи за административни работи односно колку вработени и инженери имаат.