Светската програма за храна на Обединетите нации (WFP) во Авганистан е принудена да направи кратења во септември поради големиот недостиг на средства, што ќе погоди уште 2 милиони луѓе, се вели во соопштението на организацијата. Со ова вкупниот број на луѓе погодени од намалувањето на поддршката на WFP оваа година се искачи на 10 милиони.
„Со малкуте ресурси што ни преостануваат, не можеме да им служиме на сите луѓе кои се на работ на апсолутна сиромаштија“, рече Хсијао-Веи Ли, директор на WFP во Авганистан.
Кратењата значат дека 1,4 милиони бремени жени и нивните деца повеќе не добиваат специјализирана храна наменета за спречување на неухранетост, објави агенцијата.
„За следните шест месеци, на WFP му требаат една милијарда долари за да обезбеди храна и поддршка за 21 милион луѓе“, додаваат тие во соопштението.
Авганистан страда од последиците од 40-годишниот конфликт, осакатена економија и ефектите од климатската криза. WFP ги повика земјите донатори да дадат приоритет на финансирањето за хуманитарни операции на годишното Генерално собрание на ОН во Њујорк оваа есен.