Унгарија и САД ќе договорат пакет економска соработка што ќе и помогне на унгарската економија и ќе ги ублажи последиците од можните царини на САД за производите од Европската унија, изјави унгарскиот премиер Виктор Орбан.
Орбан, долгогодишен сојузник на американскиот претседател Доналд Трамп, рече дека пакетот дополнително ќе го продлабочи политичкото партнерство меѓу Унгарија и САД. Според него, договорот ќе и помогне на Унгарија дури и ако избие трговска војна меѓу САД и Европската унија.
Трамп минатата недела најави воведување царини од 25 отсто за производите на ЕУ, тврдејќи дека Унијата е формирана за економски да им наштети на САД.
„Унгарија ќе претрпи загуби, како и сите членки на Европската унија. Сè уште не знаеме колку ќе бидат големи, но сигурно е дека нема да може да се избегнат“, рече Орбан на годишната конференција на унгарската трговска и индустриска комора.
Тој додаде дека Унгарија има добри шанси да постигне договор со Вашингтон и дека економскиот пакет треба да ги ублажи или целосно да ги неутрализира последиците од евентуална трговска војна.
Унгарските власти веќе преговараат за обновување на даночниот договор меѓу двете земји, кој беше раскинат од претходната американска администрација. Орбан посочи дека одредени делови од договорот ќе и овозможат на Унгарија да ги надомести загубите предизвикани од американските царини, обезбедувајќи компензација и во финансиска смисла и преку конкретни економски мерки.
Директната трговска изложеност на Централна и Источна Европа кон САД е ограничена, но Унгарија сака да обезбеди дека е во најдобра можна позиција во случај на економски шокови.