Унгарскиот премиер Виктор Орбан изјави дека американскиот претседателски кандидат Доналд Трамп има „детални и добро основани“ планови за ставање крај на војната во Украина.
Тој додаде дека „веројатниот исход“ од претседателските избори во САД, на кои ќе победи Трамп, значи дека ЕУ треба повторно да ги отвори дипломатските преговори со Москва.
Орбан, кој минатата недела се сретна со Трамп на неговиот имот во Палм Бич, во писмо до претседателот на Европскиот совет, Чарлс Мишел, објавено од Фајненшл тајмс, навел дека поранешниот американски претседател е подготвен да дејствува како посредник за мир веднаш по изборите.
Унгарскиот премиер посочил дека очекуваната победа на Трамп ќе значи и дека финансискиот товар за поддршка на украинските воени напори ќе се префрли на ЕУ.
„Повеќе од уверен сум дека во веројатниот исход од победата на претседателот Трамп, рамнотежата на финансискиот товар меѓу САД и ЕУ значително ќе се промени на штета на ЕУ кога станува збор за финансиската поддршка за Украина“, напишал тој.
Орбан, исто така, истакнал дека по неговите неодамнешни разговори со рускиот претседател Владимир Путин, кинескиот претседател Си Џинпинг и украинскиот претседател Володимир Зеленски, „општата опсервација“ е дека „интензитетот на воениот конфликт радикално ќе ескалира во блиска иднина“.
Европската стратегија, напишал Орбан, „ја копираше провоената политика на САД“. Тој повикал на дискусија за „дали продолжувањето на оваа политика е рационално во иднина“.
Како одговор, Мишел му замерил на Орбан, велејќи дека тој нема мандат да учествува во меѓународните преговори во име на ЕУ.
Тој, исто така, го отфрлил тврдењето на Орбан дека ЕУ има „провоена политика“.
„Русија е агресорот, а Украина е жртвата што го користи своето легитимно право на самоодбрана. Ниту една дискусија за Украина не може да се одржи без Украина“, смета Мишел.
Размената на писма дојде откако Европската комисија донесе одлука без преседан да ги бојкотира состаноците организирани од Будимпешта како дел од унгарското претседателство со ЕУ.