Ослободени се сите 19 навивачи на фудбалскиот клуб Левски кои синоќа беа приведени во Скопје. Казните им се платени со средства собрани од симпатизерите на клубот по натпреварот со Шкупи. Навивачите веќе се на пат за Софија.
За инцидентот во скопската населба Чаир, бугарските приврзаници ги запреле автомобилите, излегле од нив, по што започнала расправија која прераснала во физичка пресметка со група граѓани“, извести Јавното обвинителство.
Министерот за внатрешни работи Оливер Спасовски посочи дека напаѓачите кои со нож го избоделе бугарскиот навивач на Левски се идентификувани. Според него, автомобилите со бугарски регистрации поминале низ населбата Чаир за да ги испровоцираат граѓаните и во Македонија пристигнале со приватен превоз, а не со организиран превоз за фудбалскиот натпревар.
Како што доцна синоќа соопштија од нашето МВР, од 19-те приведени, осум лица се за насилство на спортски натпревар, две лица за физички напад на полициски службеници кои вршеле службени дејства, а девет поради агресивно однесување кон нив.
Бугарскиот конзул во Скопје вчера го посети повредениот навивач во болница, при што станало јасно дека неговата состојба е стабилна и нема ризик по неговиот живот. Бугарскиот амбасадор во Скопје остварил разговор со надлежните органи и инсистирал на итно расчистување на случајот.