Осум лица се повредени во сообраќајната незгода која се случила попладнево во 14:50 часот на регионалниот пат Велес – село Извор меѓу две комбиња, патничко и товарно. Лицата се со повреди на главата од ударот во стаклото од двете возила и, според првичната информација, се вон животна опасност, информираат од Брзата помош при ЈЗУ Здравствен дом Велес.
По укажаната прва помош, сите лица се однесени во Општата болница – Велес. Во болницата се уште се вршат прегледи на донесените осум лица и на уште неколкумината повредени во сообраќајката кои сами дошле или биле донесени со приватни коли во болницата.
Тимот на Хирушки клиники при ЈЗУ Општа болница Велес се уште врши прегледи на повредените.
Регионалниот пат Велес – село Извор најпрво беше блокиран за сообраќај, а од 17:00 часот, како што информира АМСМ, сообраќајот се одвива наизменично.