Баерн Минхен беше поразен од Астон Вила во 2. коло од Лигата на шампионите во Бирмингем со 1-0. Тоа е прв пораз на Баварците во првата фаза од елитното клупско натпреварување по повеќе од седум години. Поточно, пред Астон Вила, ПСЖ го победи со 3-0 на 27 септември 2017 година. Тогаш се играше во формат на осум групи со по четири екипи, додека од оваа сезона лигашката фаза се игра со 36 екипи.
По тој пораз, Баварците минаа во серија од 41 натпревар без пораз, а парижаните на натпреварот против Баерн ги предводеше тренерот кој вчера ги совлада – Унаи Емери.
Шпанецот ја трансформира Астон Вила од тим кој „танцуваше“ во долната половина на Премиер лигата под водство на Стивен Џерард во тим кој освои квота за Лигата на шампионите, а сега го победи моќниот Баерн.
– Останува горчливиот вкус, но Лигата на шампионите денеска не беше решена. Мора да продолжиме понатаму и да се вратиме на победите. Секој натпревар има своја приказна, имавме големи победи и не ги искористивме – изјави тренерот на Баварците, Винсент Компани по првиот пораз.
Германскиот тим го победи Динамо со 9-2 во првото коло од елитното клупско натпреварување, а на последните четири натпревари пред мечот во Бирмингем постигна 21 гол. По шест победи на стартот од сезоната, имаше реми против Баер Леверкузен (1-1), па пораз од Астон Вила.
Баерн ќе има тешко гостување во Франкфурт кај Ајнтрахт, а по репрезентативната пауза го пречекува незгодниот Штутгарт. Спектаклот е закажан за 23 октомври, кога германскиот клуб гостува кај Барселона, стар пријател на кој и нанесе болни и тешки порази во Лигата на шампионите, особено во последните неколку години…