Лекарите стравуваа дека вакцината против Ковид може да го ослаби ефектот на лековите што се користат за лекување на назофарингеален карцином, вид на рак кој го погодува грлото, но новата студија го покажува токму спротивното – вакцината против Ковид-19 всушност го забрзува лекувањето.
Ракот на назофаринксот често се третира со анти-ПД-1 имунотерапија која ги блокира ПД-1 рецепторите на површината на имуните клетки. Бидејќи вакцината против коронавирус го стимулира имунолошкиот одговор на телото преку истите сигнални патишта во клетките, експертите сакаа да истражат како таа влијае на третманот на назофарингеалниот карцином.
„Постоеше страв дека вакцината нема да биде компатибилна со анти-ПД-1 терапијата. Овој ризик е особено вистинит за ракот на назофаринксот, кој, како и вирусот САРС-КоВ-2, влијае на горниот респираторен тракт“, рече биоинформатичарот Џијан Ли од Универзитетот во Бон во Германија.
Научниците анализирале податоци од 1.537 кинески пациенти од 23 болници кои биле лекувани од рак на назофаринксот, а 373 ја примиле вакцината Синовак против коронавирус, која се користи во Кина.
„Изненадувачки, овие пациенти значително подобро реагираа на анти-ПД-1 терапијата отколку невакцинираните. Дополнително, тие имаа помалку сериозни несакани ефекти“, рече имунологот Кристијан Куртс од Универзитетот во Бон.
Експертите сè уште не знаат зошто вакцината против Ковид има позитивен ефект врз анти ПД-1 терапијата, пишува „Science Alert“.
„Претпоставуваме дека вакцинацијата активира одредени имунолошки клетки кои потоа го напаѓаат туморот. Но, треба подетално да ја истражиме оваа хипотеза“, рече докторот Чи Меи од Универзитетската болница Шанкси во Кина.
Предности и недостатоци на истражувањето
Една од силните страни на студијата е тоа што вклучува пациенти од различни кинески болници, демографски групи и региони. Недостаток беше што беше забележан еден тип на рак и ефектот на само одредена вакцина против Ковид-19.
Додека ракот на назофаринксот е редок во земји како што се САД и Велика Британија, тој е широко распространет во земјите од Југоисточна Азија и јужна Кина, можеби поради различните навики во исхраната и почестото користење на клима уред. Во Тајван, овој тип на рак е една од водечките причини за смрт кај помладите мажи, пишува „Индекс“.