„Од фудбалска гледна точка, бидејќи сега ја следам оваа генерација додека играат. Следев каде беа сместени во која дивизија, тоа беше последната Д дивизија, каде објективно беше најлошиот европски квалитет во фудбалот. Сега не сме во најлош квалитет, но бевме таму заради претходните резултати. Бев убеден дека барем ќе стигнеме до полуфиналето затоа што не видов кој може да биде пред нас. Можеби Ерменија, Грузија, Белорусија и Косово. За тие четири екипи, мислев дека ќе дојдат тој последен дел и така ѝ се случи. Овде игравме со Косово и имавме релативно проблеми, но подобри сме, тие не се доволно зрели да направат нешто повеќе. Далеку се од тоа“, го оценува Дарко Панчев, патот на нашата фудбалска репрезентација до ЕП, во интервју за српска „Нова“.
„Мислев дека ќе имаме повеќе проблеми со Грузија, но тие играа многу лошо против нас, а сепак беа домаќини. Ги добивме од една, две шанси со нормална, ништо посебна игра. Значи, очекував да дојдеме до крајот. Можеби не дека ќе бидеме први, но тука негде сигурно. Ова е нивен историски успех. Тоа им го реков пред еден месец: дека сега не треба да спијат на тоа. Затоа што за Европа не значи ништо што се квалификувавме. Тие се пласираат на секои две години. Другите постојано одат на тие големи натпреварувања и што им значи сега кога некоја Македонија се квалификувала. Многу е важно да се претставиме добро таму. И за себе и за рејтингот, да скокне цената на играчите, за некој да ги напише во тетратката и да си направат трансфери. Мое мислење е дека е важно како ќе се претстави сега. Она што го направија на европско ниво, многу брзо ќе се заборави и ќе се памети тука во Македонија – таа генерација отиде на шампионатот. Никој тоа не го забележува надвор. Тие ќе забележат, ако оставиме добар впечаток и не дај боже да направиме добар резултат. Тоа тогаш би било незаборавно и голема приказна“, вели Панчев.
Според него, затоа примерот за Исланд како мала европска земја беше позитивен, бидејќи тие се претставија добро на ЕП 2016, но и на СП 2018.
„Сите зборуваа за Исланд, цела Европа. Па, на тоа мислам. На тој начин да се претстават, сите да зборуваат за нив. Ако изгубите од сите таму, ако примите седум, осум голови, што фајде од тоа? Како ќе те паметат? Се квалификувавте затоа што ги победивте Грузија и Косово? Никому не значи тоа. На Европа треба да ѝ покажеш на шампионатот дека сте добар и дека имате вредност. Ќе видиме како тие ќе се прилагодат на сето тоа таму“, додава Панчев.