Германија беше и ќе остане доверлив партнер Северна Македонија и ќе продолжи да ја поддржува со сите расположливи сили, истакна новата германска амбасадорка во Скопје, Анке Гизелa Холштајн на денешното предавање на акредитивните писма на претседателот Стево Пендаровски во вила „Водно“.
Амбасадорката Холштајн, како што соопшти кабинетот на шефот на државата, оцени дека Северна Македонија во изминатите години спроведе важни чекори на патот на евроатлантските интеграции.
– Приемот во НАТО како 30-та членка, важните договори со соседните земји Грција и Бугарија и најпосле зеленото светло за започнување на пристапните преговори со Европската Унија кое одамна требаше да го добиете, се успеси за кои си дозволувам да Ви честитам од сѐ срце. Германија за тоа време Ви беше доверлив партнер, кој Ве поддржуваше со сите расположливи сили. Дозволете да Ве уверам дека така и ќе остане. Можете да сметате на тоа, дека сѐ, за што можам да придонесам како германска амбасадорка лично, и ќе го сторам, нагласи амбасадорката Холштајн.
Претседателот Пендаровски, посакувајќи добредојде на новата германска амбасадорка, на церемонијата на предавање на акредитивните писма оцени дека Република Северна Македонија и Сојузна Република Германија во континуитет градат пријателски и партнерски односи, посочувајќи на интензивниот политички дијалог меѓу двете држави и истакнувајќи го фактот дека Германија е најважен економски и трговски партнер на Северна Македонија, со трговска размена преку четири милијарди евра на годишно ниво.
Пендаровски оцени дека вклучувањето на прашањето за проширувањето во приоритетите на германското претседавање со Европската Унија во втората половина на 2020 година е јасна порака за нашата држава, но и недвосмислен стимул за понатамошно спроведување на неопходните суштински реформи во сите сфери од општественото живеење, а особено во изградбата на правната држава и во борбата со организираниот криминал и со високата корупција.
– Свесни сме дека пред вашето претседавање со Советот на Европската Унија се исправа најголемиот економски предизвик во историјата на ЕУ, поврзан со заздравување на земјите погодени од коронавирусот. Но, истовремено сме сведоци дека пандемијата уште повеќе ги засили европските чувства на солидарност, единство и одговорност кон Западен Балкан. Во тие рамки, нашите очекувања се до крајот на годината да се одржи првата меѓувладина конференција со што ќе се означи и официјалниот почеток на преговорите на Република Северна Македонија со Европската Унија, рече Пендаровски на церемонијата.
Претседателот се заблагодарил за севкупната германска помош за нашата држава во справувањето со пандемијата од КОВИД-19.