Претседателот на Северна Македонија, Стево Пендаровски излезе со реакција на соопштението на Јавното обвинителство на Република Северна Македонија во кое се вели дека „не е време за напади на институциите“, и се додава „дека нема да дозволи дискредитирање на обвинители и мешање во кривични постапки од страна на политичарите“.
„Во обраќањето на вчерашната прес-конференција по ниту еден основ немам направено дискредитација на Јавното обвинителство на Република Северна Македонија, ниту пак постои намера за напаѓање на надлежните институции и мешање во кривичните постапки коишто се во тек.
Потенцирам дека во своето обраќање изразив целосна поддршка за надлежните институции, а особено на обвинителството и судот и истакнав дека ќе сторам се, за да ги заштитам од евентуални притисоци при спроведување на истрагата и целосно расветлување на случајот „Рекет“.
Уште еднаш укажувам дека е потребно ефективно, брзо и темелно завршување на истрагата за случајот „Рекет“ почитувајќи го начелото на презумпција на невиност“, се вели во реакцијата на Пендаровски.