Премиерот на Бугарија, Кирил Петков повика да го „надминеме нашето его, малку понова и не толку блиска историја“, како и да ги преземеме следните чекори во односите со Северна Македонија, јави БГНЕС.
Петков ова го изјави на средбата со Бугарите во Битола, каде што присуствуваше на отворањето на Бугарскиот културен центар „Иван Михаилов“. Во делегацијата се и потпретседателката Илијана Јотова, актуелната министерка за надворешни работи Теодора Генчовска, поранешната министерка за надворешни работи Екатерина Захариева и други.
„Доколку не работиме заедно од двете страни на границата, постои опасност проблемите што ги имавме со години да продолжат. Од друга страна, постои реална можност, ако се обединиме, ако посегнеме во сите правци со владата на РСМ, имаме шанса да направиме вистински чекори напред“, рече Петков.
Според него, додека владите можат да работат на документи и различни дипломатски чекори што треба да се направат, тука борбата е за срцата и умот на луѓето од двете страни на границата, а тоа не може да се случи врз основа на документи.
„Ова мора да се случи врз основа на заедничко дејствување, кохезија и заедничка работа. Она што стана јасно во нашата коалиција, и во Бугарија во целина, и мислам од другата страна на границата во РСМ и во разни институции, дека е време да ги решиме нашите разлики, бидејќи стабилноста на Бугарија, на РСМ, на Балканот, зависат од овие заеднички дејствиа“, рече премиерот Петков.
Според него, треба да го смениме значењето на терминот „балканизација“.
„Нашата задача во моментов е да го смениме овој збор и да го направиме значаен, користејќи го заедничкиот потенцијал, работејќи заедно да го направиме овој регион најбрзо растечки регион во Европа. Треба да го надминеме нашето его, една малку понова и не толку блиска историја. Време е да се направат следните чекори напред“, рече Петков.
За бугарскиот премиер, „Бугарите во С.Македонија се мост“.
Министерката за надворешни работи Теодора Генчовска рече дека напорите на сите институции треба да бидат насочени кон гарантирање на правата на Бугарите во РСМ и нивно вклучување во Уставот на земјата.
„Ова ќе биде нашата главна цел. Се надевам дека со помош на пратениците кои се тука и во Народното собрание тоа ќе се постигне што е можно поскоро“, рече таа.
Фото: БГНЕС