Дали некогаш ви се случило да испиете чаша вода непосредно пред спиење, а потоа да станувате во текот на ноќта за да одите во тоалет?
Доволниот внес на течности е клучен за да останеме хидрирани, но важно е во кое време од вечерта пиеме различни пијалоци бидејќи тоа може да влијае на нашиот сон.
Мажите треба да пијат 15,5 чаши дневно, а жените 11,5 чаши, а важен дел од тоа се однесува и на времето на пиењето течности.
„Премногу од било кој вид течност пред спиење може да влијае на вашиот циклус на спиење. Добар сон е клучот за намалување на ризикот од дебелина, срцеви заболувања, мозочен удар, депресија и целокупното расположение и способност да функционирате секој ден“, посочува Ејми Браганини, портпарол на Академијата за исхрана и диететика, пренесува HuffPost.
Браганини ги повикува своите пациенти да престанат да пијат течности најмалку два часа пред спиење, но најдобрата временска рамка зависи од тоа што го пиете.
Пијалоци со кофеин
Можеби е примамливо да пиете кафе или друг пијалок кој содржи кофеин за да го пребродите поспаното попладне, но колку подоцна пиете кофеин, толку повеќе тоа може да влијае на вашиот сон. Консумирањето повеќе од 400 мг кофеин дневно – што е еквивалент на четири шолји – може да предизвика дехидрација, анксиозност и несоница.
„За да имате добар сон, добра идеја е да престанете да пиете кофеин најмалку шест часа пред спиење“, вели Крис Винтер, експерт за спиење и невролог.
Алкохолни пијалоци
Една чаша вино или пиво пред спиење може да направи да се чувствувате поспани, но всушност може да го наруши вашиот сон. Тоа е затоа што алкохолот може да има и седативно и стимулирачко дејство врз телото.
Пиењето алкохол во вечерните часови може да го наруши циклусот на спиење со брзо движење на очите (РЕМ), што е најдлабоката фаза на спиење. Исто така, може да предизвика живописни или застрашувачки соништа, да ги прекине постојаните шеми на дишење во текот на ноќта.
Најдобро е да не пиете алкохол четири до шест часа пред спиење. Ова е отприлика времето што им е потребно на повеќето луѓе да го метаболизираат алкохолот, што исто така зависи од вашата големина и тежина и од тоа колку често пиете.
Сокови и други слатки пијалоци
Не се препорачува да се консумираат премногу слатки пијалоци пред спиење. Консумирањето слатки пијалоци, како газирани пијалоци или сок, во вечерните часови ќе го подигне нивото на шеќер во крвта, што го поттикнува панкреасот да ослободи инсулин, хормон кој дозволува гликозата да влезе во вашите клетки за енергија. Овој наплив на шеќер може да ве држи будни ноќе. Затоа, најдобро е да избегнувате слатки пијалоци најмалку два часа пред спиење.
Вода
Пиењето вода во текот на денот ви помага да избегнете дехидрација пред спиење. Водата ве одржува хидрирани и ја регулира вашата телесна температура во текот на ноќта, што ви помага да спиете подобро. Се препорачува да се пие вода веднаш по будењето наутро за да се рехидрира телото после спиење. Сепак, околу еден час пред да заспиете, би било добро да не внесувате големи количини вода.