Окружниот суд во Благоевград ја потврди одлуката на Агенцијата за регистри да ја регистрира ОМО „Илинден“, известија бугарски медиуми.
Судската пресуда е од 30 јули.
ОМО „Илинден“ на 14 јули поднела барање за регистрација во Агенцијата за регистри (исто тело како Централниот регистер на РСМ, само во Бугарија) за впишување како здружение со нестопанска дејност.
Станува збор за организација на Македонци по самосвест, што Бугарија 34 години не ја прифаќа. Организацијата мина низ неколку фази и имиња и статути и членови, но во суштина нејзината политичка амбиција досега се погазува од бугарските власти.
Два дена подоцна, одговорниот регистратор донел одлука за отфрлање, со појаснување дека има неодреденост и нејаснотии во описот на дејноста на здружението. Регистраторот „утврдил“ и неправилност во тоа што претседателот и записничарот на основачкото собрание се потпишале на одделен лист, а не под самиот текст на одлуката за основање.
Истото го утврдиле и за статутот. Како неправилност е констатирано и тоа дека како орган на здружението/организацијата е прифатен претседателот на Извршниот одбор, а според бугарскиот закон тоа е Генералното собрание.
Кирил Тилев поднел жалба во судот дека одбивањето е од политички причини, а не поради процедурални пропусти.
Но Окружниот суд на Благоевград имал спротивно мислење – дека Агенцијата за регистри е во право и нејзината одлука треба да се потврди.
Во барањето за впишување има записник од основачко собрание на 27 април 2025, потпишан од 7 основачи, но не е одбележан часот и местото на состанокот.
Како што велат бугарските медиуми, тоа е доволно за да се одбие барање за регистрација.
Освен тоа, судијата констатирал дека статутот треба да има правила за зачленување и отчленување, како и правила за управување со имотните односи при прекин на членството.
Решението на Окружниот суд во Благоевград не е конечно и може да се оспори пред Софискиот апелативен суд.
Од 2001 година досега Бугарија неколку пати е осудувана од Европскиот суд за човекови права во Стразбур поради одбивањето да ја регистрира организацијата на Македонците во Бугарија, но Бугарија, како земја-членка на ЕУ нема никаков проблем со тоа,.