Министерството за внатрешни работи целосно го расчисти случајот пријавен до Секторот за компјутерски криминал на 24.06.2024 од страна на претседателот на Уставниот суд кој пријави закани по животот и безбедноста на судија на Уставен суд упатени од лидерот на партијата ПЦЕР, Самка Ибраимовски преку социјална мрежа.
МВР презеде соодветни мерки и извршиле службен разговор со Ибраимовски во СВР Тетово.
-Денеска (26.06.2024) Секторот за компјутерски криминал до ОЈО Скопје поднесе кривична пријава против С.И. (69) за сторено кривично дело „загрозување на сигурноста“ чл.144 ст.5 предвиденo и казнивo според Кривичниот законик. Пријавениот С.И. на својот фејсбук профил упатил сериозни закани и повици за насилство кон судија на Уставниот суд, информираа од полицијата.
Ибраимовски вчера порача дека не се заканувал никому.
-Тоа што ме пријавија во полиција е заради тоа што пишувам на Фејсбук и сум еден од предлагачите на Законот за облигациски односи. Имам демократско право да пишувам. Сепак, сметам дека е срамно што една колешка која беше пратеник со мене, а сега уставна судијка, Ана Павловска-Данева, да ме пријави во полиција дека наводно сум сакал да вршам убиства. Само сум поставил прашања – што ако настанат убиства? Само сум го пренел гласот на народот, што ми пишуваат мене и велат дека ќе земат пиштол и ќе убијат некого или сами ќе се убијат… Кој би одговарал за тоа?, кажа поранешниот пратеник на прес-конференција.
Како што вели, Павловска Данева добро го познава и смета дека требала да има почит кон него и да го побара по телефон.