Во Скопје денеска, како дел од иницијативата Отворен Балкан, беа потпишани два протоколи кои ќе овозможат воспоставување слободен пазар на труд за земјите од Отворениот Балкан – Македонија, Србија и Албанија.
Потпишани се Протоколот за спроведување на договорот за условите за слободен пристап до пазарот на трудот во Западен Балкан и Протоколот за поврзување на шемата за електронска идентификација на граѓаните од Западен Балкан.
Претседателот на Србија, Александар Вучиќ денеска пред потпишувањето изјави дека овие протоколи ќе овозможат на 1 март да стапи на сила целосно слободен пазар на труд на земјите од Отворен Балкан.
Тој рече дека ова потпишување го чекале со месеци и дека тоа е одлична и важна вест, бидејќи заедничкиот пазар на труд ќе придонесе за создавање подобар бизнис амбиент и за домашните и за странските компании, како и за надминување на проблем со недостаток на работна сила и создавање пазар на труд од речиси 11 милиони жители.