Финската премиерка Сана Марин денеска изјави дека била тестирана на дрога, по објавувањето на видеото на почетокот на неделава од забавувањето со пријателите и нагласи дека никогаш во животот не се дрогирала.
„Денеска се тестирав на дрога и резултатите ќе стигнат за седум дена. Никогаш во животот не сум се дрогирала“, изјави Марин на прес-конференцијата.
Таа додаде дека нејзината способност да ги извршува своите должности не била нарушена ноќта на забавата и дека би го напуштила собирот доколку било потребно да изврши некоја работа.
Видеата од Марин како се забавува со познати фински уметници почнаа да кружат на социјалните мрежи оваа недела, а беа објавени и од медиумите во Финска и во странство.
Политичарите од владејачката коалиција и опозицијата тогаш ја повикаа Марин да биде тестирана на дрога.