Протести предводени од премиерот на Гренланд, Јенс Фредерик Нилсен, денес се одржаа во главниот град на Гренланд, Нуук, против плановите на американскиот претседател Доналд Трамп да ја преземе контролата врз арктичкиот остров.
Стотици демонстранти, предводени од премиерот на Гренланд, носеа знамиња и транспаренти на кои пишуваше „Гренланд не е на продажба“ и „Не значи не“ додека маршираа низ центарот на градот до американскиот конзулат, објави Ројтерс.
Протести против плановите на американскиот претседател Доналд Трамп да ја преземе контролата врз Гренланд, кој е данска автономна територија, се одржаа и порано денес во данскиот главен град Копенхаген, на кои учествуваа околу 20.000 луѓе.
Демонстрантите, кои се собраа на плоштадот на Градското собрание во Копенхаген пред да се упатат кон амбасадата на САД, скандираа „Гренланд не е на продажба“, а некои држеа транспаренти со слогани како „Рацете подалеку од Гренланд“ и црвено-белото знаме на Гренланд.
„Демонстрираме против американските изјави и амбиции за анексија на Гренланд. Бараме почитување на правото на Данска и Гренланд на самоопределување. Се надеваме дека ќе покажеме дека има многумина од нас кои го поддржуваат Гренланд“, се вели во соопштението на Здружението на Инуити.
Протестите беа организирани од групи за човекови права од Гренланд, во соработка со невладината организација ActionAid Denmark.
„Многу сум благодарна за огромната поддршка што ние како Гренландци ја добивме… Исто така, испраќаме порака до светот дека сите треба да се разбудите. Гренланд и Гренландците ненамерно станаа фронт во борбата за демократија и човекови права“, рече Џули Радемахер, претседателка на Уагута, организација на Гренландците во Данска, на протестот во Копенхаген.
Протести се одржаа и на други локации низ Данска, а во Гренланд, демонстрации се одржаа во градовите Нуук, Асијат, Какорток и Илулисат, објави данскиот телевизиски канал DR.
„Бараме почитување на данското кралство и правото на Гренланд на самоопределување“, изјави претседателката на Инуитската асоцијација на локални здруженија на Гренланд во Данска, Камила Зисинг.
Претседателот на САД, Доналд Трамп, изјави дека Гренланд е од витално значење за безбедноста на САД, поради неговата стратешка локација и големите резерви на минерали, и дека не ја исклучува употребата на сила за да го преземе.
Неколку европски земји испратија воен персонал во Гренланд оваа недела на барање на Данска.