Претседателката на партијата Алтернатива за Германија (AFD), Алис Вајдел, оцени дека „брзото или безусловно пристапување кон Европската Унија (ЕУ) во моментов не би било во интерес на Србија, Германија или Европа.
„Пристапувањето би значело за Србија дека ќе мора да се откаже од голем дел од својата тешко стекната независност, без економските и политичките предности да ги надминат ризиците“, рече Вајдел во интервју за весникот „Политика“.
Според неа, улогата на Германија во регионот треба да биде поинаква – „ние треба да бидеме сигурен, искрен партнер, билатерално, прагматично и на рамноправна основа“.
„Наместо да создаваме лажни надежи или да вршиме притисок од Брисел, треба да ја поддржиме Србија во зајакнувањето на сопствената сила преку фер трговски односи, инвестиции, трансфер на технологија и културна размена – без политичко туторство“, нагласи Вајдел.
Таа рече дека „Србија има право да оди по својот пат, со или без ЕУ“, а Германија треба да го почитува и поддржи тоа право.
„Особено е важно историските и современите предизвици на Балканот – вклучително и косовското прашање – да не бидат дополнително влошени од идеолошките барања на ЕУ. Стабилен и мирен регион има потреба од реализам, меѓусебно почитување и решенија што ги земаат предвид интересите на сите вклучени страни – а не еднообразни решенија од Брисел“, рече Вајдел.