Вишиот суд во Краљево осуди припадник на српската армија од Ниш, чии иницијали се М. В., на 12 години затвор за предизвикување сообраќајна несреќа додека управувал со борбено возило во кое загинаа пет лица на 12 септември минатата година.
Тој беше осуден за тешко кривично дело против безбедноста во јавниот сообраќај, соопшти судот.
Во текот на постапката беше утврдено дека М. В. управувал со борбено возило на српската армија, тип самооден топ, под дејство на 0,37 промили алкохол во крвта и дека не бил способен безбедно да го управува возилото, како и дека преминал во спротивната лента и удрил во автомобил „Форд фокус“, кој поминал под военото возило.
Во сообраќајната несреќа загинаа возачот на автомобилот, Даниел Лазовиќ, и неговите три деца, како и соседката на семејството, Дијана Кутлачиќ. Сопатник во возилото, сопругата на Лазовиќ, Мирјана Лазовиќ, е тешко повредена.
Ова е првостепена пресуда на која обвинителството и одбраната имаат право да поднесат жалба до Апелациониот суд, објавија белградските медиуми.