Република Северна Македонија останува посветена на глобалната хуманитарна акција која има за цел да им помогне на граѓаните од Авганистан кои во изминатиов период работеа на подобрување на човековите права, демократијата и мирот, соопштија од Владата.
Од таму информираат дека денеска на Меѓународниот аеродром во Скопје пристигнале 44 граѓани од Авганистан, односно од организацијата Тиркиз моунтејн (Тurquoise Мountаin). Овие лица се активисти на оваа организација, но меѓу нив има и членови на нивните семејства.
-Организацијата е основана во 2006 година од Принцот Чарлс. Инаку организацијата Тurquoise Мountаin е меѓународна организација со хумана мисија која изминативе години имаше свои успешни активности во Авганистан.
Дополнително, сакаме да истакнеме дека оваа организација реставрираше повеќе од 150 историски објекти, третираше околу 165 илјади пациенти во клиниката во Кабул, отвори и поддржа повеќе од 50 мали бизниси воо Авганистан, Мјанмар, и други активности.
Лицата ќе бидат привремено сместени во Скопје додека не се обезбеди трансфер до крајна нивна дестинација. Трошоците и за оваа група ќе бидат целосно покриени од меѓународните организации.
По слетувањето предвидена е стандардна процедура, поддршка од Црвениот крст, безбедносна проверка и заштита, медицинска поддршка, ПЦР тест и можност за вакцина, стои во владиното соопштение.