Koчанскиот основен суд им одредил притвор од 30 дена на тројцата поранешни градоначалници на Кочани, каде изминатиот викенд избувна пожарот во дискотеката Пулс, при што загинаа 59 лица, а повеќе од 190 беа повредени.
Притвор им е одреден на Љупчо Папазов, кој пред неколку дена поднесе неотповиклива оставка, како и на поранешните градоначалници Николчо Илијев и Ратко Димитровски. Со тоа, бројката на лицата на кои им е одреден притвор од 30 дена изнесува 24.
30-дневен притвор му е одреден и на екс-министерот за економија Крешник Бектеши, поранешната државна секретарка во ова Министерство, Размена Чекиќ-Дуровиќ, како и раководител во Министерството, Беким Хаџиу.
Вкупниот број осомничени за пожарот во дискотеката „Пулс“ во Кочани засега е 34 физички лица, откако државниот јавен обвинител Љупчо Коцевски соопшти дека е отворена истражна постапка против 27 физички и три правни лица, по првите истражни постапки против седум полициски службеници од СВР Штип и ПСОН Кочани. Во првата фаза во постапувањето на МВР и Обвнителството, поднесени се две кривични пријави против 34 физички и три правни лица, за кривично дело „тешки дела против општата сигурност“ по член 292 во врска со „предизвикување општа опасност“ по член 288 од Кривичниот законик. Едно лице е пријавено и за „примање поткуп“ по член 357 од КЗ. Тројца од осомничените се хоспитализирани, а на останатите 31 им е одреден притвор.
Истрага ќе се води и за примање и давање поткуп. Надлежните најавуваат брза, ефикасна и праведна истрага и не отфрлаат нејзино проширување со други лица.