Министерката за култура, Бисера Костадиновска-Стојчевска денеска објави дека е пронајден неоткриен трислоен фрескоживопис во македонскиот споменик на културата – црквата „Успение на Пресвета Богородица“ во Лешок.
-Владата и одговорните институции, вклучително и Националниот конзерваторски центар – Скопје, поддржани од средства од Министерството за култура, во изминатите пет години ја имаат во своите приоритети заштитата на оваа црква. Овој клучен напор кулминираше со спроведување на конзерваторски проект за ѕидно сликање. Со гордост можам да споделам дека овој потфат успешно го потврди постоењето на три карактеристични фази на сликарството, вклучувајќи го и сега откриениот најстар слој. Овој трет слој, сместен под слојот од 17 век во олтарот, прикажува целосна фигура на епископ со свиток во раката, порача министерката.
Според неа, ова откритие е повик за акција за дополнително да ги поттикнеме нашите иницијативи за заштита и зачувување на македонското богато културно наследство.
Министерката појасни дека 164 милиони денари оваа година се издвоени за заштита на културното наследство.
-Ние сме целосно свесни и одговорно тврдиме дека ова е скап потфат за кој бара квалификувани професионалци. Приказната за нашето минато, вградена во богатства како Лешочката црква, мора да ја негуваме и сегашните и идните генерации, истакна Костадиновска-Стојчевска.