Соединетите Држави им претставија на своите сојузници нацрт-предлог за мировен договор меѓу Русија и Украина, вклучувајќи рамковни услови за прекин на борбите и постепено ублажување на санкциите кон Москва во случај на траен прекин на огнот, пишува Блумберг.
Плановите беа обелоденети дури и кога американскиот државен секретар Марко Рубио утрово испрати јасно предупредување дека САД се подготвени да „се откажат“ од мировните преговори доколку не се постигне брзо напредок. Американскиот потпретседател Џеј-Ди Венс, сепак, во петокот во Рим рече дека е „оптимист“ во врска со изгледите за ставање крај на војната.
Американскиот план предвидува замрзнување на војната, а украинските територии кои сега се окупирани би останале под контрола на Русија, дознава Блумберг од дипломатски кругови. Би биле исклучени и амбициите на Киев за влез во НАТО. Изворите на Блумберг одбија да откријат дополнителни детали, наведувајќи ја доверливата природа на разговорите.
Планот беше претставен за време на вчерашните состаноци во Париз, поточно на средбата меѓу францускиот претседател Емануел Макрон и американскиот пратеник Стив Виткоф, како и средбата меѓу Рубио и советниците и преговарачите за национална безбедност од Франција, Германија, Обединетото Кралство и Украина.
Американските власти посочија дека сакаат да обезбедат целосен прекин на огнот во рок од неколку недели, објави Блумберг претходно. Сојузниците ќе се состанат во Лондон следната недела за да ги продолжат разговорите.
Еден од официјалните лица изјави дека плановите, за кои треба дополнително да се разговара со Киев, нема да значат конечно решение и дека европските сојузници нема да ги признаат окупираните територии како руски. Официјални лица истакнаа дека разговорите би биле бесмислени доколку Кремљ не се согласи да ги прекине борбите и дека обезбедувањето на Украина со безбедносни гаранции е од клучно значење.