На црната листа на САД се ставени премиерот на Република Српска Радован Вишковиќ, претседателот на Собранието Ненад Стевандиќ, српската членка на Претседателството на БиХ, Жељка Цвијановиќ и министерот за правда Милош Букејловиќ, јави РТРС.
Тие лидери се директно одговорни за поттикнување на усвојување на закон во Собранието на Република Српска, со кој одлуките на Уставниот суд на Босна и Херцеговина би се прогласиле за неприменливи во Република Српска, а со тоа се попречува и се заканува спроведувањето на Дејтонскиот мировен договор, според соопштението на американското Министерство за финансии.
Нивното однесување дополнително го загрозува идниот пат на земјата и успешната интеграција во евроатлантските институции.
„Ќе продолжиме да го поддржуваме народот на Босна и Херцеговина во нивните напори за одржување на владеењето на правото и обезбедување мир и просперитет“, изјави потсекретарот во Министерството за финансии задолжен за тероризам и финансиско разузнавање Брајан Нелсон.