Руската Централна изборна комисија денеска ја одобри кандидатурата на првите двајца кандидати кои ќе се натпреваруваат со претседателот Владимир Путин на изборите во март.
Комисијата ја потврди кандидатурата на Леонид Слуцки од националистичката Либерално-демократска партија и Владислав Даванков од Новата народна партија.
Ниту едниот ниту другиот не претставуваат значителен предизвик за Путин, а нивните партии во парламентот во голема мера го поддржуваат законодавството поддржано од партијата на Путин, Единствена Русија.
Слуцки го предводи Комитетот за надворешни работи на Федералното собрание на Руската Федерација, Долниот дом на парламентот и ја поддржува надворешната политика на Кремљ, а на последните избори на кои учествуваше во 2018 година, освои помалку од 6 отсто од гласовите .
Даванков е заменик-претседател на Државната дума, неговата партија е основана во 2020 година и во моментов има 15 пратеници во парламентот.
Комунистичката партија на Русија го најави Николај Харитонов за свој кандидат, но изборната комисија се уште официјално не го регистрирала.
Харитонов веќе беше противник на Путин на изборите во 2004 година, кога го освои второто место.
Минатиот месец Изборната комисија ја отфрли кандидатурата на Екатерина Дунцова, политичарка која се противи на војната во Украина, наведувајќи грешки во документацијата, вклучително и правописни грешки.
Врховниот суд потоа ја отфрли жалбата на Дунцова против одлуката на комисијата.
Според рускиот закон, кандидатите мора да бидат номинирани од најмалку 500 поддржувачи и исто така мора да соберат најмалку 300.000 потписи од 40 или повеќе региони.