Рускиот претседател Владимир Путин предупреди на „проблеми“ со соседна Финска откако земјата се приклучи на Северноатлантската алијанса (НАТО) претходно оваа година.
Влезот на Финска во НАТО означи голема промена во безбедносната средина во Северна Европа и додаде околу 1.300 километри на границата на алијансата со Русија.
Тоа беше удар и за претседателот Путин, кој долго време предупредуваше на проширувањето на НАТО.
„Тие (Западот) ја зедоа Финска и ја вовлекоа во НАТО! Зошто, имавме ли спорови со Финска? Сите спорови, вклучително и оние од територијална природа во средината на 20 век, беа решени многу одамна“, рече Путин во интервјуто објавено во неделата.
„Немаше проблеми, но сега ќе има, бидејќи сега таму ќе го создадеме воениот округ Ленинград и таму дефинитивно ќе ги концентрираме воените единици“, додаде Путин во интервју за руската државна телевизија „Русија 1“.
Путин, исто така, ги отфрли како „целосна глупост“ изјавите на американскиот претседател Џо Бајден, кој претходно овој месец предупреди дека Путин „ќе продолжи“ доколку ја окупира Украина, сугерирајќи дека Русија на крајот би можела да нападне сојузник на НАТО и да ги вовлече американските војници во конфликтот.
Рускиот лидер рече дека Русија „нема причина, интерес, геополитички интерес, ниту економски, политички, ниту воен, да се бори со земјите од НАТО“, додавајќи дека Москва нема територијални претензии во земјите на НАТО.
„Не постои желба да се расипуваат односите со нив (земјите на НАТО), ние сме заинтересирани за развој на односите“, додаде Путин.