Еден ден откако беше објавено дека Лука Модриќ го напушта Реал Мадрид по 12 години, Кралскиот клуб се збогува со уште еден великан.
Карло Анчелоти ќе го предводи Реал Мадрид за последен пат во сабота, со што ќе го заврши второто поглавје од својата тренерска кариера на „Сантијаго Бернабеу“. Италијанскиот стручњак го напушта Кралскиот клуб откако освои вкупно 15 трофеи во два мандата и испиша некои од најсветлите страници во историјата на Реал.
Анчелоти првпат пристигна во Мадрид во 2013 година и остана во својот прв мандат до 2015 година, пред да се врати во 2021 година и да го води клубот до летото 2025 година. Во тој период, тој стана најтрофејниот тренер во историјата на Реал Мадрид, со импресивна низа победи: три Лиги на шампиони, три Светски клупски првенства, три Европски Суперкупа, две Примери, два Кралски купа и два Шпански Суперкупа.
Сезона без трофеј и збогум на Бернабеу
Сепак, неговата последна сезона завршува разочарувачки. Реал ја загуби борбата за домашните трофеи од Барселона, која славеше во Суперкупот и во Кралскиот куп и, сè укажува на тоа, ќе ја освои и Ла Лига. Во Лигата на шампионите, Мадрид го заврши натпреварувањето во четвртфиналето, каде што беше елиминиран од Арсенал.
И покрај ова, статусот на Анчелоти во клубот останува недопрен. Реал Мадрид денес официјално му се заблагодари и се збогува со пофални зборови: „Фудбалскиот клуб Реал Мадрид и Карло Анчелоти постигнаа договор за прекин на неговиот тренерски мандат во Реал Мадрид. Нашиот клуб сака да изрази благодарност и почит кон човекот кој е една од најголемите легенди на Реал Мадрид и светскиот фудбал. Карло Анчелоти го водеше нашиот тим низ еден од најуспешните периоди во 123-годишната историја на клубот и стана тренер со најмногу трофеи во нашата историја…“
Чаби Алонсо го презема кормилото
Неговиот наследник речиси сигурно ќе биде Чаби Алонсо, сегашниот тренер на Баер Леверкузен, кој минатата сезона брилијантно играше во Бундеслигата и Европа, а во Мадрид е пречекан како долгорочен проект и човек кој ќе изгради нова генерација.
Во сабота, стадионот „Сантијаго Бернабеу“ ќе биде местото на големо емотивно збогување. Соопштението на клубот заврши со трогателна порака:
„За претседателот на Реал Мадрид, Флорентино Перез, Карло Анчелоти засекогаш ќе биде дел од големото мадридско семејство. Горди сме што можевме да уживаме во работата на тренер кој ни помогна да постигнеме толку многу успеси и кој, покрај тоа, ги отелотвори вредностите на нашиот клуб на исклучителен начин. Реал Мадрид му посакува нему и на неговото семејство многу среќа во новото поглавје од нивните животи“.