Протекот на бегалци од Грција кон Македонија се одвива без проблеми и покрај поставувањето втора жичена ограда од македонска страна.
Волонтери на „Доктори без граници“, кои им помагаат на бегалците во привремениот камп на бензинската станица во близина на Поликастро, за „Мета“ објаснија дека бегалците бргу се преместуваат од привремениот камп кон кампот на границата.
Иако викендов на бензинската станица во десетици автобуси чекале околу 5.000 бегалци, веќе вчера речиси сите беа префрлени кај Идомени, од каде потоа, преку Македонија, заминуваат кон земјите на ЕУ.
Ситуацијата беше мирна. Бегалците, седнати покрај импровизираните огништа, мирно чекаа да бидат префрлени. Некои помагаа да се постават шатори, други, пак, уживаа во сонцето, а најмалите заборавија на тешките моменти и уживаа во детска пријателска партија фудбал.
Бројките секојдневно се различни, но бројот на бегалци не се намалува. Во Атина секојдневно пристигнуваат од 1.000 до 2.000 нови бегалци, а исто толку и во привремениот камп во Поликастро.
Грчката влада за бегалското прашање е во иста ситуација како и за финансиската криза – приклештена меѓу барањата на ЕУ за изградба на прифатни центри на островите, но и во близина на Солун и на Атина од една страна, а, од друга остри, протести и реакции од граѓаните од локалните заедници и од островите против изградба на бегалски центри во нивна близина