Настанот дополнително ги заостри тензиите во градот, каде веќе се одржуваат масовни протести против репресивните мерки на администрацијата на американскиот претседател Доналд Трамп.
Пукањето се случило само две недели по друг смртоносен инцидент во кој, исто така, бил вмешан агент на ICE. Алекс Прети, по професија медицински техничар на оддел за интензивна нега, бил убиен во близина на својот дом, што предизвика силни реакции во јавноста и нови барања за политичка и институционална одговорност.
Сведокот на убиството, кој за американските медиуми се претставил како Хавиер, изјави дека бил приведен веднаш по пукањето и задржан неколку часа во федерална зграда заедно со уште дваесетина лица. Тој тврди дека лично видел како агентот пукал во Прети и нагласи дека нема да дозволи да биде заплашен, и покрај притисоците од федералните власти.
Во меѓувреме, Доналд Трамп најави дека во Минеаполис ќе го испрати Том Хоман, поранешен висок функционер задолжен за граничната политика, познат како „цар на границата“, со цел да ја надгледува состојбата и да ја засили контролата. Одлуката јавно ја поддржа и министерката за внатрешна безбедност Кристи Ноем, која порача дека присуството на Хоман ќе придонесе за „мир, безбедност и одговорност“ во градот.
Случајот отвори нов бран критики кон имиграциската политика на администрацијата на Трамп, а граѓанските организации предупредуваат дека зголеменото присуство на федерални агенти може дополнително да ја влоши состојбата и да доведе до нови судири и протести.