Марџори Тејлор – Грин, републиканска конгресменка и докажан поддржувач на политиките на претседателот на САД, Доналд Трамп, отворено го обвини Израел дека врши геноцид над Палестинците во Газа. Ова е прв ваков случај некој од Републиканската партија да излезе со осуда за Израел, оти политиката на Трамп и на неговата администрација, како и на републиканците е во поддршка на израелските тези, а ужасите во Газа ги премолчуваат.
Во реакција на веста дека нејзиниот партиски колега Ренди Фајн е избришан од списокот на политички фигури што ги поддржува еврејската лоби-група AIPAC – поради неговиот повик до Израел Палестинците да ги изгладнат до смрт – Тејлор – Грин директно изјави дека во Газа се случува геноцид.
Инаку, случајот на Фајн е навистина интересен, поради тоа што е санкциониран од лобисти – американски Евреи.
Конгресменката во постот нагласува дека Фајн „отворено повикува на изгладнување на невини луѓе и деца“, а потоа недвосмислено зборува за катастрофата на Палестинците и повторно го осудува Фајн.
„Највистинита и најлесна работа е да се каже дека 7 октомври во Израел беше ужасен и сите заложници мора да бидат вратени, но исто и геноцидот, хуманитарната криза и изгладнувањето што се случуваат во Газа. А тоа Евреин – американски конгресмен да повикува на постојано изгладнување на невини луѓе и деца е срамно. Неговата ужасна изјава всушност ќе предизвика уште повеќе антисемитизам“, пишува конгресменката од Долниот дом.
I remember the first time I met Randy Fine when he was a candidate before he barely won Florida’s deep red 6th district seat, as we were being told he might actually lose the seat because the strong Trump district couldn’t relate to him and didn’t like him.
He was telling me that… https://t.co/rdGDBNDszl— Rep. Marjorie Taylor Greene🇺🇸 (@RepMTG) July 29, 2025
На 7 октомври 2023 година, Хамас изврши голем напад врз Израел, при што околу 1.250 Израелци беа убиени во ракетни напади или директно од припадниците на Хамас што сееја смрт на улиците и по домовите, а околу 230 Израелци беа однесени во Газа како заложници.
Марџори Тејлор – Грин, сепак, не е единствената припадничка на Републиканската партија што отворено одби да го поддржува Израел – покрај нејзиниот колега Томас Маси, но дефинитивно е првата што го употребила зборот „геноцид“.
Инаку, таа е еден од најголемите сојузници на Трамп во Републиканската партија, и е позната и по бројни контроверзни изјави, во кои има и многу со тези за заговори.