Американскиот државен секретар Марко Рубио пристигна во Брисел каде ќе учествува на состанокот на министрите за надворешни работи на НАТО, а по пристигнувањето изјави дека Америка не планира да го напушти пактот.
„САД остануваат посветени на НАТО, но нашите европски сојузници мора да ги зголемат трошоците за одбрана“, беше пораката на Рубио по неговото пристигнување во Брисел.
Тој ги нарече „хистерија“ коментарите дека Америка ќе го напушти НАТО и повтори дека САД ќе останат дел од овој воен пакт.
„Доналд Трамп не е против НАТО, но тој е против НАТО што го нема потребниот капацитет и кое содржи членки кои не ги исполнуваат обврските што им се пропишани“, додаде американскиот државен секретар.
Рубио потсети и дека Трамп побарал од земјите-членки да трошат пет отсто од својот БДП за одбрана и дека „САД нема да можат толку посветено да се грижат за безбедноста на континентот“.
„Сакаме да го напуштиме овој состанок со разбирање дека сме на реален пат до целта од пет проценти, која ги вклучува и САД“, рече тој.
Додаде дека „никој во Европа не очекува тоа да се случи за една или две години“, но дека „важно е да се работи на тоа“.
Од друга страна, земјите членки на НАТО од Европа на оваа средба треба да му го претстават на Рубио својот план за зголемување на трошоците за одбрана, но и да се обидат да се вклучат во разговорите што Трамп ги води со Владимир Путин за ставање крај на руската агресија врз Украина.