Русија ќе продолжи да ги почитува ограничувањата на нејзиниот нуклеарен арсенал наметнати со Новиот договор СТАРТ, и покрај одлуката да го суспендира своето учество во историскиот руско-американски договор за разоружување што денеска го објави претседателот Владимир Путин.
„Русија има намера да одржи одговорен пристап и ќе продолжи, за време на договорот, строго да ги почитува квантитативните граници на стратешкото офанзивно оружје“, соопшти руското Министерство за надворешни работи.
Путин денеска изјави дека Русија го суспендира своето учество во договорот со САД за ограничување на нуклеарното оружје, таканаречениот договор Нов СТАРТ (Мерки за натамошно намалување и ограничување на стратешкото офанзивно оружје), потпишан во 2010 година и се закани дека ќе спроведе нови нуклеарни тестови ако САД први го направат тоа.
Руското министерство ја оправда одлуката со „деструктивни акции на САД“, обвинувајќи ја земјата за повеќекратно прекршување на договорот што „го компромитира неговото спроведување“.
Руските власти оценија дека „екстремното непријателство“ на Вашингтон и неговата „отворена посветеност на злонамерната ескалација на конфликтот во Украина“ создадоа „фундаментално различна безбедносна средина“ за Русија.
„САД и Западот се обидуваат да и наштетат на нашата земја на сите нивоа, во сите области и во сите региони во светот“, изјави руската дипломатија, сметајќи дека „статус кво повеќе не е возможен“.
Новиот договор СТАРТ го ограничува бројот на нуклеарни боеви глави со долг дострел што двете земји можат да ги распоредат и ја ограничува употребата на ракети способни да носат нуклеарно оружје.
Тоа е последен билатерален договор од ваков тип меѓу САД и Русија. Веќе на почетокот на август, Москва објави дека ги суспендира американските инспекции на своите воени локации како дел од тој договор, наведувајќи дека дејствува како одговор на американските пречки за руските инспекции во САД.