Институтот за експериментална медицина (ИЕМ) од Санкт Петербург планира во текот на следната година да ги заврши претклиничките испитувања на првата вакцина во светот против коронавирус која може да се јаде, која ќе има вкус на познатиот руски млечен производ „Рјаженка“, изјави директорот на ИЕМ, Александар Дмитријев.
Претходно, потпретседателот на Руската академија на науките (РАС), академик Владимир Чехонин, објави претклинички студии за необична вакцина против ковид во форма на јогурт.
Според Дмитријев, истражувањето започнало на Институтот за експериментална медицина пред околу една година, пренесува „Спутник“.
Кога руската влада го одобри развојот на „Центарот за персонализирана медицина“, во кој беа вклучени ИЕМ и Националниот центар за медицински истражувања „Алмазов“, проектот за развој на првата вакцина која може да се јаде во светот за борба против коронавирусот стана една од областите на истражување.
„Според експертите, потребни се нешто повеќе од два милиони евра за да се завршат пред-клиничките и клиничките испитувања и во моментов бараме можности за вон-буџетско финансирање“, рече Дмитријев, додавајќи дека претклиничките студии се очекува да бидат завршени до крајот на 2021 година или почетокот на 2022 година.
Авторот на идејата за вакцината во форма на ферментиран млечен производ, раководителот на одделот за молекуларна микробиологија и лабораторијата за молекуларна генетика на патогени микроорганизми ИЕМ, Александар Суворов, вели дека специфичноста на лекот не е само во едноставниот начин на примена.
„И вакцините во форма на инекции и мукозални вакцини предизвикуваат имунолошки одговор. На клеточно ниво, ‘ловците’ на патогени бактерии и вируси почнуваат да се развиваат, а антителата се формираат на хуморално ниво. Во исто време, со користење на мукозална вакцина, друга класа на антителата се формираат со реакција на вакцината со инјекција, кога се произведуваат имуноглобулини А (IgA)“, објасни научникот.
Според него, Институтот за експериментална медицина има долгогодишно искуство во развој на вакцини засновани на живи бактерии, со чија помош се прават ферментирани млечни производи, така што веќе има слични вакцини против грип, пневмокока и стрептокока.
Според научниците, вакцината која може да се јаде скоро и не се разликува по вкус од обичните ферментирани млечни производи.