Соединетите Американски Држави утврдија дека најмалку 22 американски државјани се убиени во нападите на Хамас врз Израел, изјави денеска портпаролот на Стејт департментот.
Американската влада преговара со земји-партнери, вклучувајќи ги Израел и Египет, за да обезбеди безбедно минување на Американците и другите цивили од појасот Газа, пренесува Ројтерс.
Цитирајќи неименуван висок американски функционер, Си-Ен-Ен претходно објави дека Египет сака да отвори хуманитарен коридор за испраќање храна и медицински материјали во Газа, но не сака да ја отвори својата граница за да прифати цивили кои бегаат.
„Сметаме дека е важно на американските граѓани кои се во Газа да им биде дозволено да ја напуштат, а тоа е прашање на кое работиме“, изјави портпаролот на американскиот Стејт департмент Метју Милер.
Американската медиумска куќа наведува дека американските цивили во Газа рекле дека не чувствуваат дека американската влада е во состојба да им помогне, поради што расте притисокот за воспоставување хуманитарен коридор, пренесува Танјуг.