Американските власти велат дека САД повеќе нема да споделуваат нуклеарни информации со Русија поради непридржувањето на Москва до договорот Нов СТАРТ, од кој рускиот претседател Владимир Путин се повлече минатиот месец.
Пактот за контрола на оружјето меѓу САД и Русија, потпишан од тогашните претседатели Барак Обама и Димитриј Медведев во 2010 година, ја ограничува секоја земја на не повеќе од 1.550 распоредени нуклеарни боеви глави и 700 распоредени проектили и бомбардери. Договорот предвидува инспекции на лице место за проверка на усогласеноста.
Претставници на Белата куќа, Пентагон и Стејт департментот рекоа дека САД понудиле да продолжат да ги даваат тие информации на Русија, дури и откако Путин минатиот месец го суспендираше учеството на Русија во договорот.
Сепак, Москва го извести Вашингтон дека нема да ги споделува своите податоци. Сега и САД и Русија целосно престануваат да споделуваат податоци за нуклеарното оружје на секои две години, пренесе „Фокс њуз“.
„Би сакале да ја видиме Русија назад во Новиот СТАРТ целосно, во согласност. Ние веруваме дека Новиот СТАРТ договор е добар за двете наши земји“, изјави портпаролот на Националната безбедност, Џон Кирби.
Белата куќа, која претходно ја обвини Русија за повеќекратно прекршување на договорот, соопшти дека одбивањето на Русија да го почитува е „правно неважечко“ и дека одлуката за задржување на нуклеарните податоци е уште едно прекршување.