САД предупредија на можноста за воведување санкции на земји, компании и поединци кои ја снабдуваат Русија со муниција или ја поддржуваат нејзината воена индустрија – во обидот на Вашингтон да го зголеми притисокот врз Москва поради војната во Украина, пренесe „Гласот на Америка“.
Воли Адејемо, заменик-секретарот за финансии на САД, за време на состанокот на земјите кои ги разгледуваа санкциите против Русија, посочи дека Вашингтон е подготвен да преземе мерки против земјите кои ги избегнуваат американските санкции.
Учесниците на состанокот, на кој покрај Американците, учествуваа и претставници на земјите од Европската унија, Канада и Јужна Кореја – вкупно 33 од нив, разгледаа дополнителни чекори кои би можеле да се применат и на руската воена индустрија, како и ефектите од досегашните ограничувања воведени досега поради руската инвазија на Украина.
„Вашингтон е подготвен да воведе санкции за оние кои доставуваат муниција или друга воена стока за Русија, како и за приватни воени компании или паравоени групи кои учествуваат или ја поддржуваат руската војна во Украина“, соопшти американското Министерство за финансии.
Се известува дека телото, како и Стејт департментот, укажале на мерките кои досега се преземени против руската воена индустрија – наведувајќи ги ризиците со кои се соочуваат оние кои обезбедуваат материјална поддршка за руската инвазија на Украина.
„Со ограничувањето на пристапот на Русија до напредна технологија, стоки и услуги, Вашингтон и неговите партнери ја намалија неговата способност да го замени оружјето – вклучително и 6.000 парчиња воена опрема што беа уништени во војната досега“, беше прецизирано за време на состанокот, пренесува Ројтерс.
Исто така, САД предупредија на значителните трошоци на Русија за муниција, поради што се свртуваат кон земји како Иран и Северна Кореја за набавки и опрема, вклучувајќи беспилотни летала, ракети и артилериска муниција, објави Ројтерс, врз основа на прегледот на извештајот.
Извозните ограничувања наметнати од САД и 37 други земји резултираа со тоа што руската одбранбена индустрија се потпира на увезената микроелектроника и други ресурси на воената индустрија. Евидентиран е и недостаток на делови, што го забавува производството на тенкови, авиони, подморници и други воени системи.
Според извештајот што го видел Ројтерс, САД на состанокот предупредиле дека руските разузнавачки служби се обидуваат незаконски да добијат западна технологија и делови чиј извоз во Русија е забранет.
„Мрежата што се користи за набавка на технологијата вклучува олигарси, полномошници и „шел“ компании и ги таргетира Европа и Северна Америка како приоритет“, се вели во извештајот.
Претходно во годината, Вашингтон воведе строги ограничувања за испорака на американска и странска стока во Русија, доколку тие се произведени со американска опрема или технологија, во обид да ги ослабне руските воени и индустриски сектори.
Ресурсите што ги користи Русија во областа на одбраната, вселенската технологија и поморството се контролирани. Тие се насочени и кон енергетскиот сектор, како и кон луксузните стоки и производи што ги користи руската елита.
Агенцијата Ројтерс објави и дека на прашањето што друго можат да направат западните сојузници за да го засилат притисокот врз Русија, неименуван европски финансиски функционер и учесник на состанокот одговорил дека списокот на санкционирани лица може да се прошири.
„Можеме да ја прошириме и листата на стоки чиј извоз ќе биде ограничен“, рече тој функционер.