Напаѓачот на Арсенал, Букајо Сака ќе биде надвор од терените повеќе од два месеци откако му беше оперирана тетивата. Ова го откри тимскиот менаџер Микел Артета, цитиран од Ројтерс.
„Тој ја помина процедурата. Се помина добро, но за жал ќе биде надвор од терените многу, многу недели“, изјави разочараниот шпански стручњак по победата на неговиот тим над Ипсвич од 1-0.
„Мислам дека ќе биде надвор од теренот повеќе од два месеци. Зависи од тоа како ткивото ќе почне да заздравува, зависи од првата недела од движењето. Да видиме, тешко е да се каже“, додаде Артета.
Сака има постигнато 5 гола и има 10 асистенции за тимот од почетокот на сезоната во Премиер лигата, со што е еден од најкреативните играчи на „топчиите“. 23-годишниот англиски репрезентативец беше принудно заменет против Кристал Палас претходно овој месец, напуштајќи го стадионот со патерици.