Шпанскиот премиер Педро Санчез проговори за најавата за дополнителни американски царини и рече дека Мадрид го подготвил својот прв одговор на овој потег на тимот на Трамп.
Имено, како што нагласи Санчез, Шпанија ќе обезбеди 14,1 милијарди евра за справување со ефектите од тарифите што ги најави американскиот претседател за целата ЕУ.
„Царинскиот пакет што го објави Трамп е спротивно на вистината. Ова е само изговор за казнување на земјите, спроведување стерилен протекционизам и обид за собирање приходи за да се ублажи дефицитот создаден од фискалните политики кои, според мене, се повеќе од сомнителни“, рече Санчез.
Тој го демантираше и процентот што Трамп го наведе во контекст на царините за американските производи на тлото на ЕУ.
„Не е точно дека ЕУ применува царини од 39 отсто за американските производи. Всушност, ако внимателно ги погледнеме бројките, Европската унија применува само три отсто царини за некои производи. Не е точно дека економскиот однос меѓу Европската унија и САД е неурамнотежен“, рече тој.