Мицкоски да каже колкава штета им направи на граѓаните со блокадите во Скопје и да се повлече од блокадите, побараа денеска од СДСМ.
Од партијата поставија неколку прашања до лидерот на ВМРО-ДПМНЕ.
-Колкава е штетата на илјадници граѓани кои наместо со автобус мора да плаќаат такси до своите работни места? Колкава е штетата што граѓани не можат на време да стигнат на прегледи и операции? Колкава е штетата по стопанството затоа што не можат навреме да испорачаат стоки и услуги?
Мицкоски прво нека даде одговор на овие прашања а потоа да се повлече од блокадите со кои се изживува врз граѓаните, стои во партиското соопштение.
Трет ден по ред траат блокадите и протестот на приватните превозници кои до неодамна беа дел од јавниот превоз во главниот град. Град Скопје сега им нуди на приватните превозници индивидуално да склучат договор за превоз со Градот или да формираат нови здруженија, бидејќи „Слобода превоз“ и „Макекспрес“ немаат право повторно да се пријават.