Пратеничката на СДСМ, Санела Шкриељ, кажа дека владејачкото мнозинство ќе ја поддржи измената на Законот за здруженија и фондации, кој што е влезен во собраниска процедура по скратена постапка и е предложен од опозицијата.
„Законот за здруженија и фондации навистина бара ревидирање, бидејќи станува збор за закон којшто е стар веќе десетина години. Апсолутно го поддржуваме правото на слобода на здружување, но исто така мора да застанеме во одбрана на вредностите на кои се темели нашата држава, а тоа се антифашистичките вредности, така што секој предлог што е во таа насока ќе го поддржиме“, изјави денеска Шкријељ во Собранието.
Таа, одговарајќи на прашање дали на пленарна седница ќе дадат поддршка на законските измени за овој закон предложени од ВМРО-ДПМНЕ, кажа дека ќе дадат поддршка и оти се согласуваат дека има потреба од носење на такви законски измени.
„Тоа значи да, поддршка, денес се утврдува потребата од носење на такви законски измени, а ние се согласуваме дека има потреба од носење на такви законски измени“, рече Шкријељ.
Пратеничката од опозициската ВМРО-ДПМНЕ Рашела Мизрахи смета дека во предлог измените и дополнувањата на Законот за политички партии што ги најавува СДСМ е ископиран истиот текст од предлогот на ВМРО-ДПМНЕ за изменување и дополнување на Законот за здруженија и фондации, а со кој треба да се спречи контроверзни имиња да бидат имиња на здруженија на граѓани.
„СДСМ се огласи на прес-конференција кажувајќи дека ќе има предлог измени и дополнувања на Законот за политички партии во кој е апсолутно ископиран текстот којшто беше даден во предлог-законот за здруженија и фондации и апсолутно истиот текст е ставен во ова предлог законско решение – изјави денеска Мизрахи во Собранието, која до Собранието достави измени на Законот за здруженија и фондации уследи по отворањето бугарски клубови со имињата „Ванчо Михајлов“ на 16 април во Битола и „Цар Борис Трети“ на 7 октомври во Охрид.
Пратеничката Мизрахи меѓу другото рече дека се уште не се сигурни дали СДСМ ќе го поддржи предлог законот за здруженија и фондации на ВМРО-ДПМНЕ, додавајќи дека искрено очекувала ова законско решение да помине денеска во Собранието.
„Се слуша дека предлог законот за здруженија и фондации којшто беше доставен минатиот петок во 16:30 часот ќе биде прифатен од СДСМ, односно од пратениците на мнозинството. Сепак, останува како декларативна изјава за којашто не сме сигурни дали тоа така ќе се издејствува на самиот крај. Пленарната седница закажана на која беше и оваа точка, доцни и се уште не е ни отворена, така што не може да гарантираме што ќе се случи денес иако искрено лично се надевав дека ова законско решение ќе помине во Собранието“ – рече Мизрахи која одговарајќи на новинарско прашање рече дека не би можела да каже дали до крајот на денот ќе се одржи пленарната седница.