Скандалозните тврдења на ВМРО-ДПМНЕ дека на македонскиот пазар има отровен зеленчук се покажаа целосно лажни. Во Македонија во продажба нема зеленчук или овошје од увоз што не се безбедни за конзумирање и тоа е потврдено согласно стандардните процедури на надлежните институции, порачаа утрово од СДСМ.
Со ова, велат од владеачката партија, уште еднаш се потврди дека ВМРО-ДПМНЕ во недостиг на идеи и програма, се што прави е пласирање на лажни вести и свесно ширење паника меѓу граѓаните.
-По којзнае кој пат партијата предводена од Христијан Мицкоски е фатена во лага, но по обичај не собира храброст да се извини на јавноста, што само по себе покажува дека на ВМРО-ДПМНЕ воопшто не и грижа за граѓаните, потенцираат од СДСМ.
Од Агенцијата за храна и ветеринарство вчера соопштија дека контроли и се прават редовно како на увезените така и на домашните производи. На обвинувањата од страна на опозициската партија дека во промет е пуштен зеленчук кои содржи метали, директорот на АХВ, Николче Бабовски вели дека размислуваат да поднесат кривична пријава за ширење на лажни вести.
Во својот став, Цветан Трипуновски од ВМРО ДПМНЕ вели дека анализите недвосмислено потврдуваат присуство на пестициди и тешки метали во овошјето и зеленчукот кои се увезени. Тој прашува зошто Државната фитосанитара лабораторија се повикува на максимално дозволено ниво на тешки метали и анекс на правилник кој не е на сила а нема објаснување ниту за детектираното ниво на арсен во производите. Според Трипуновски поднесувањето на кривична пријава само говори за очајнички обид да се извлечат одгвороните од овој мега скандал.